شعر محلی دو بیتی کیجا جان
شعر محلی
بورم يزد و ته وِ يزدي بيارم
ته وسّه مخمل عالي بيارم
کاري نکن ته سر وسني بيارم
ته ململ چش ره عصري بيارم
.....................
ته بوردن بوردن آ مه هارش هارش
قشنگ کيجا جان دنبال ره هارش
کهو آسمون ره کمبه سفارش
هرکجه یار شونه نئیره وارش
.....................
سر تپه نماز کند کيجا جان
کمر ره دلا راس کند کيجا جان
خدا جه التماس کند کيجا جان
مه ره شِه ور دراز کند کيجاجان
.....................
اونجه ته اسّايي مه روبروئه
ته تن کت و شلوار رنگ کهوئه
اگر دونم اين عاشقي دروئه
يک مثقال ترياک اين جان گروهه
.....................
دياري دياري نزن اشاره
دشمنون بيتنه دور اماره
الهي دشمن دل بووئه پاره
من آ ته عاشقي ندارنه چاره
.....................
اگر مه ره خواني شب تار
برو ندارني وسيله با قطار برو
اگر دشمن بهيته سر راه ره
هاکن ميون برو آب درياره
.....................
برو تا گندم يک دانه بويم
برو تا او رودخانه بويم
همين که شو بيّه دستي به گردن
که روز روشن بيه بيگانه بويم
.....................
سرم درد بهيته تا حد گردن
اجل برسيه ونه بمردن
اجل ماره نکوش ما نوجوانيم
گل نشکفته ي مازندرانيم
.....................
ساري سور دار چند چلّه دارنه
دِتا بلبل ونه سر ناله دارنه
يکي بلبل که داغ وچه دارنه
يکي بلبل عاشق گم کرده دارنه
.....................
اتاق چار دری پرده به پرده
من و تو هنيشيم هرده به هرده
انده هنيشيم تا آفتاب دگرده
تموم دشمونون دل بترکه
.....................
بنال بلبل بنال تا من بنالم
ته درد گل من درد يارم
ته درد گل بنال شش ماه و شش روز
من درد يار بنالم هر شب و روز
.....................
اِسپه پيرهن نکن ته تن دياره
يواش يواش برو مه مار بيداره
يواش يواش برو انجيل سايه
نا مه مار بشناسه نا مه همسايه
.....................
هراز او بموهه پل ره بورده
من و مه دلبر دل ره بورده
رفقون جمع بوين پل ره بسازين
من و مه دلبر دل ره بسازين
.....................
بلندِ قد دارنه بلندِ بازو
بلند دَروِن سر گيرنه وضو
من آ ته هنيشيم زانو به زانو
ته دل درد دره آ مه دل آرزو
.....................
کيجاي سره پيش دار دارنه هلي
دِتا طِلا درِنه گِنه اميري
الهي طلا آ نيره ته گلي
مگر ته دل دره درد عاشقي
.....................
شباي زمستون دارمه انتظار
نيشتمه نال سر ندارمه قرار
ته ره قسم دمبه جان ته برار
مه دل نشکن آ برو مه کنار
.....................
فلک آخر مه ره غريب هاکرده
از ديدن ته بي نصيب هاکرده
مه ره دور از منه طبيب هاکرده
کهنه دشمن ره مه رقيب هاکرده
.....................
نيشتبيِمه شه سِره من زومه ناله
بِلبل خَوِر بياده نوبِهاره
درد عاشقي دارمه نوونه چاره
مست بلبل ته ناله بلاره
.....................
شب وروز ته وِسّه من زمّه ناله
دل من تنگ بيّه نوونه پاره
دِشمِنون شماره هاکنم چه کار
نينگنين جدايي من و منه يار
.....................
ته گوش گشواره آ گردن تِمِني
کيجا بوته ريکا اَمه سِره نِني
اِسا که من اِمبه شوني خِسِني
معلوم بيه کيجا مه ره نخواني
.....................
خدايا سر هدايي سامون هاده
خدايا درد هدايي درمون هاده
ته جه من نخواسمه مال و ثروت
جان خدا مه ره هم زبون هاده
.....................
چندِ من هِرسّم کَلِک کنار
چند من هاکنم ستاره شمار
شيشک و ترازي همه شونّه مار
آخر بمو مه قشنگ يار
.....................
پاييز بموهه وا دکته صحراره
ارباب در اِنه زارع گيرنه شه لِفاره
قربون بهووم قدرت خداره
زارع بزوهه ارباب په کِفاره
.....................
کيجاي نالِ بِن تو دکشم
تو انده تو بخِرم نالّ بورم لو
مار گنه چچيه دتِر گنه گو
بيچاره دِتِرا چو بَخرده چو
.....................
مسلمونون مه ره با کارد بکوشين
مه گوشت ره بِورين دهات بروشين
مه گوشت ره بورين دهات به دهات
همه ره کم هادين مه يارره زياد
.....................
عقل وِنه آدم کلّه دوو
کيجا وِنه آدم مله دوو
صِواحي نماشون راه کوچه دوو
چِش وه ره بوينه دل تازه بوو
.....................
کيجا جان سر ته من زن نورمه
همان قول که هدامه ته ره ورمه
همان قول هدامه ديروز نماشون
کدوم کافر ته ره کرده پشيمون
